Tula

Ika-tatlong adlaw it kuwarenta, ruha,
ag tatlong tuig nak inibhanan
Nicon F. Fameronag

1
Kuwarentang uwak nak hiwak
ka nagkakakak
it kuman kag aga
sa plasa
it Sibale Academy.
Nagbabantay it mumo,
ag tura it alumni
it gab-i,
sa rinugos nak baylehan,
nak sa sonata’y kinuyang.
Imaw kali kag ika-tatlong adlaw—
it pag-inistoryahan, pagpisan
pag ginur-anan, pagkablitan
it mga Sibalenhong
Sibale Academy
ka ging busri-an
sa kina-ayaman.

2
Ruhang Sibalenhong ging gagaos
ag inapaka-huytok
ka nagpapanilhig
sa plasa
it Sibale Academy.
Ging pipiphi, ging sisipno
Kag mga likot ag kalat
nak memorya it alumni
it kag nakalipas nak panahon
sa malipay nak ragipon
nak indi-iy mapatuyaran
kung sa-uno ray.
Imaw kali kag ika-tatlong adlaw—
it pag inistoryahan, pagpisan
pag ngisli-an, pagkablitan
it mga Sibalenhong
Sibale Academy
ka ging ril-atan
it paghigugma-an.

3
Tatlong motor nak magkasunor
ka naglarga
it kuman kag aga
sa banwa.
Ambubong it istorya—ag memorya
it mga alumni nak naghalin ney kag iba,
nak nagririlag ka mata
it yuhang pay matikrag
sa kabuyong ag kasadya.
Nagsisimyat sa mga nabilin,
naghator, nag-abyay, nagbabay
naghinghing: “Kita’y kita ray”.
Imaw kali kag ika-tatlong adlaw—
ka Isla ay nabanhaw—
it pag-inistoryahan, pagpisan
pag hinayakhakan, pangintrimisan
it mga Sibalenhong
Sibale Academy
Ka ging busri-an
it pag inibhanan,
kuwarenta, ruha, ag tatlong
tuig giy ka nagligar.


Sibale Academy Grounds
7:35 A. M., 13 April, 2009